Keneh: Lenhloi Khawmhsuat

Description

Lai holh in a chuak mi lenhloi cauk ah atu cauk Keneh hi a uk 51nk a si. Caṭialtu Isaac Lian hi capo tete a ṭial tawn i Lianbawi le Salai Nanyan hi biazai a ṭial tawn an si, sianghleirun siangngakchia chuak mi mekazin editor a ttuan bal zong an si fawn.

Rev. Carson Hniar Kio, Salai Minhnin Mang, Salai Zinghmuh (Falam), C. Kawl Lian Thang, Joel Ling, Mang Hram Kung, tbk hnu Lai lenhloi ah cun phundang tein (anmah le saṭal tein) lenhloi ṭial a thiam a ṭial kho an si. An ca na rel sin ah bia tumtlang pipi hmang lo in an ca hmual an fahter khawh ning, thil fa tete a lo mi kongkau thlir in an bia sullam an ngeihter ning, tawi tete in an lenhloi an pumh ning, ti bantuk na hmuh pah thluahmah ko lai.

Hi cauk chung ah an lenhloi fung 31 aa tel. Biahmaitthi ah Salai Ṭial Awi Thang nih a ṭial mi Lai holh lenhloi tuanbia tawi le atu 2020 tiang a chuak cang mi Lai holh lenhloi cauk cazin (bibliography) zong aa tel.

“An cauk min hi Keneh ti a si. A sak an thiam ngai, an ṭial mi he zong aa tlak tuk ka ti. An ngakchiat cep cawh lio in sianghleirun an phanh tiang an keneh. Phundang cun, Thantlang peng ṭawngcaw in Premier League tiang an keneh ti khawh zong a si rih… An neh a thar rualrual in sining thar le ruahnak thar he an kan nehpiak. Hi an neh thar nih hin i tharchuah peng a hau mi Lai caholh tharchuahnak le ṭhanchonak zeimawzat a bawmh hrimhrim lai tiah ka ruah.” – Joel Ling