Lungput

Description

THEIHTERNAK

Tu lio kan ram i a ṭhangmi minung kan lungput a rawhzia cu chim hau lo a si. A hlei in mino kan lungput a rawh ning ko hi a zualhma. Hiti kan lungput a rawhnak a ruang hi ṭhate von dothlat ahcun hmuh khawhmi a um ko lai. Zeiruang i a va si pekah lungput rawh tu kha a poimi cu a si bik ko. Atu ahhin uknak von i thleng seh, zalen deuh hna in hung um usihlaw atu kan lungput ning ngai hin kan i hruai kho hnga maw, rian kan ṭuanṭi kho hnga maw, ti hi ruah ngai hau in a um. Kan chan le kan thlihran ruangah pei a si cu tiin lungput ṭhatlei panh kan i timh duh lo ahcun atu nakin zual lei panh dawh in kan um chin lengmang.

Lungput a tluan lo ahcun i hruainak a tluang kho lo, ṭuanṭimi rian zong a tluang duh bal lo. Cucaah, kanmah pumpak ca in, kan chungkhar in kan miphun ca tiang rian kan domh hlan ah kan lungput kan tluanter, kan pitcalter, kan ṭhatter hmasa ding hi a rak biapi ngai.

Lungput kongkau hi a kau ngaingai, kanmah tepawl nih von purh dah khawh dih ding le, von fianter ding ahcun a fawi lo. Atu ka von chuahpimi zong hi, nunchimhnak le cawnpiaknak caah si loin, tulio kan khuaruah, kan lungput (a hlei in mino) he pehtlai in ruahchih awk ah ti tu in ka hun chuahpimi a si. Lungput kong hi biapi ngai i ka ruah caah, kiangkap mino he i hawikomhnak kan ngeih caan ah ka ceihpi tawn hna. Atu cauk in a hun chuahnak zong hi, Yangon Lai Baptist Church nih an tuahmi Mino Camp (Tantaunggyi 2009) ah kal kaa tim ve i cu camp chung i ceihṭi awk in ka hun kauh deuhmi a si. Cun, ‘Mino le Duhnak’ timi ka hun chap. Hi ka hun chapmi hi cu 2002 ah cauk in ka rak chuahmi “Duhzia Thiam” chungin ka laak ṭhanmi deuh an si. Duhnak zong hi lungput cungah aa hngat kho ve tiin ka ruah caah ka hun chapnak a si.

Hi cauk chuahnak ah chawva lei in a ka bawmtu Pi Sui Chin (Thantlang peng Tikir khuami, atu Canada ah a um i Auschwits cauk zong Lai holh reltu caah a kan lehpiaktu) cungah kaa lawm hringhran. Biahmaiṭhi a ka ṭialpiaktu Rev. Dr. Sang Awr cungah siseh, a hran a ka relpiaktu Pu Liankil Hlawnching cungah siseh kaa lawmhnak langhter chap ka duh.

Joel Ling

April 2, 2009

Yangon